話說今朝早等校巴，落街等左五分鐘，見到天陰陰有少少想落雨，心諗，平時校巴都好準時，反正一分鐘之後我就會係巴士上面，無有怕。但係世事，就係唔到你唔信邪，校巴係預定的時間無出現，而短短三十秒內突然風雲變色，落起大雨，大大粒咁打落嚟。我當堂嚇一跳，然後好狼狽咁係個袋到搵把遮出黎，點知搵到遮套搵唔到把遮，先醒起尋日都有落雨，把遮攞咗番公司，無攞番屋企。如果係咁，係自己傻仔，怪不得人。等車的地方無瓦遮頭，結果我要硬食一場無情雨。
番到公司，無雨不單止，仲要出太陽。我心諗，點解個天要玩我，如果要玩，點解你要玩一個手無寸鐵的市民。後來我諗，至少，個天唔止玩我一個。
有時，我的第二人格會同我講：「呢啲事好平常，唔好講咩個天玩你，個天要落雨就落雨，駛唔駛同你預約先？」唔好怪個天、唔好怪人，怪自己可以吧。
其實，我都會好憎自己。我想問自己點解咁失敗，想問自己點解咁無用：點解你可以咁懶？點解你明明有準備但係上到個台會驚？點解你明明有時間但唔做緊要既事、無時間仲要打機？點解你明明有溫書但係考得唔好？點解你明明領先緊但係最後會輸？
有人話平時做開小丑既人，內心其實係最失落，我話唔會嬲嬲豬既人，內心其實係最憤怒。
我唔知發明成語百忍成金的人，
到底是EQ高還是懦弱，
至少為份工，我可以忍氣吞聲；
對住其他人，我可以低聲下氣；
為大局著想，我可以選擇沉默；
比人話無用，可以當無事發生；
就連打機比人單刀帶入禁區，
我都可以忍住唔鏟佢，
咁做人仲有咩唔可以忍？
但係我到底有無必要咁做？
「不自量力，又何其言勇。」是在朋友面書看到的句子，我覺得好適合形容自己。即使我可以做到律己以嚴、待人以寬，其實我無時無刻都覺得心浮氣躁。
變形俠醫Dr. Banner有一句說話其實我都想講好耐，
"That is my secret Cap, I am always angry."
沒有留言:
張貼留言